24 მაისს, 21-ე საუკუნის ხელნაწერი „ვეფხისტყაოსნის“ შექმნაში მონაწილეობა ზუგდიდელებმა მიიღეს. ვეფხისტყაოსნის გადაწერის ცერემონია დადიანების სასახლეში გაიმართება.
უკვდავი პოემის გადაწერაში მონაწილეობა, სამეგრელო-ზემო სვანეთის გუბერნატორის აპარატის უფროსმა და ადმინისტრაციის თანამშრომლებმა მიიღეს. ვეფხისტყაოსანი გადაწერეს ზუგდიდის მუნიციპალიტეტის გამგებელმა და მისმა მოადგილემაც. ვეფხისტყაოსნის გადაწერა ნებისმიერ მსურველს შეეძლო.
პროექტი უპრეცედენტოდ სახალხო და მასშტაბურია – მხატვარ ქეთი მატაბელის მიერ შექმნილი ხელნაკეთი წიგნი „ვეფხისტყაოსანი“, საქართველოს დედაქალაქსა და რეგიონებში 26 მაისის ჩათვლით „იმოგზაურებს“. პოემის გადაწერა საზეიმოდ 26 მაისს თბილისში, რუსთაველის გამზირზე, რუსთაველის თეატრის წინ დასრულდება.
პროექტი „გადაწერე ვეფხისტყაოსანი“ 15 მაისს, ახალციხეში, რაბათის ციხის ტერიტორიაზე დაიწყო, 16 მაისს, კი „ვეფხისტყაოსნის“ სტროფები ვარძიის ტერიტორიაზე გადაწერეს. „ვეფხისტყაოსნის“ სტროფების გადაწერაში მონაწილეობა უკვე მიიღეს პარლამენტარებმა, 112-ს, შინაგან საქმეთა სამინისტროს, ეროვნული ბიბლიოთეკის და სახელმწიფო უსაფრთხოების სამსახურის თანამშრომლებმა. ზუგდიდამდე ვეფხისტყაოსნის სტროფები გადაწერეს გორში, ქუთაისში, ოზურგეთში, ბათუმსა და მცხეთაში.
პროექტი „გადაწერე ვეფხისტყაოსანი“ საქართველოს კულტურისა და ძეგლთა დაცვის სამინისტროს ორგანიზებით ტარდება.