ესტონეთის საგარეო საქმეთა მინისტრი მოუწოდებს ევროკავშირს, დაიწყოს საქართველოსთან ვიზალიბერალიზაციის გაუქმების პროცესი. ამის შესახებ მარგუს ცაჰკნმამ ბრიუსელში ნატო-ს წევრი ქვეყნების საგარეო საქმეთა მინისტრების შეხვედრაზე ჟურნალისტის კითხვის საპასუხოდ განაცხადა.
„ესტონეთმა ათობით პირის წინააღმდეგ დააწესა პერსონალური სანქციები, ეროვნული სანქციები, მათ შორის ივანიშვილისა და საქართველოს პრემიერ-მინისტრის წინააღმდეგ. ასევე, ჩვენ მოვუწოდებთ ევროკავშირს, დაიწყოს ვიზალიბერალიზაციის გაუქმების პროცესი. ეს შეიძლება იყოს განხილული. ამას სჭირდება 15 წევრი სახელმწიფოს თანხმობა, რომ დაიწყოს ეს პროცესი, სკრინინგი და მოვთხოვოთ რეჟიმს, შეცვალოს ქცევა“, – განაცხადა მარგუს ცაჰკნამ.
ფაქტს, პრემიერი გამოეხმაურა და აღნიშნა, რომ ცვლილებებს არ უნდა ველოდოთ.
„ეს კონკრეტული კაცი იმდენად არასერიოზულია, რომ მასზე ვერ გავაკეთებ სერიოზულ კომენტარს. ვიზალიბერალიზაციას რაც შეეხება, აქ რაიმე ცვლილებებს არ უნდა ველოდოთ. ეს არის „დიფ სთეითის“ დავალების ერთ-ერთი შემსრულებელი, რომელიც ახმოვანებს ხოლმე, თავისი აზრით, დამაშინებელ გზავნილებს, თუმცა ამით საზოგადოება არცერთი გასული წლის განმავლობაში არ შეშინებულა და არც მოგვიანებით შეშინდება. ცაჰკნამაც საკუთარ ქვეყანას უნდა მიხედოს. აბსოლუტურად არარელევანტურია დღეს ეს საკითხი, უბრალოდ რაღაც კონკრეტული დავალებაა, რომელიც საგარეო საქმეთა მინისტრმა შეასრულა ესტონეთში“, – განაცხადა ირაკლი კობახიძემ.