სამეგრელო-ზემო სვანეთის გუბერნატორის მოვალეობის შემსრულებლის, მალხაზ თორიას ინფორმაციით, დაბა მესტიაში გუშინ აღებული 800-ზე მეტი ნიმუშიდან 600-ის პასუხი კორონავირუსზე უარყოფითია, 200-ის პასუხი კი მოგვიანებით გახდება ცნობილი.
„რადგან გამოვლენილი ტესტებიდან ერთ-ერთი ინფიცირებული იყო დაბა მესტიის მკვიდრი, ეპიდემიოლოგებთან ერთად, შტაბმა მიიღო გადაწყვეტილება, მასშტაბური კვლევები ჩაგვეტარებინა დაბა მესტიაში. აქ მუშაობდა რვა ჯგუფი, დანარჩენები კი მუშაობდნენ სხვა ლოკაციებზე. დღეს აიღეს 500-მდე ნიმუში, რომელთა პასუხები იქნება ხვალ ცნობილი. გუშინ აღებული 800-ზე მეტი პასუხიდან 600-ის პასუხი არის უარყოფითი, დანარჩენს ველოდებით“, – აღნიშნა მალხაზ თორიამ.
მისივე ცნობით, დღეს მესტიიდან გაემგზავრა 112 სტუმარი, რომელებიც სხვადასხვა საკარანტინო სივრცეში განთავსდებიან.