საქართველოს საპატრიარქო დავით სარალიძისა და ლევან დადუნაშვილის მშობლებთან შეხვედრის შესახებ განცხადებას ავრცელებს, რომელსაც უცვლელად გთავაზობთ:
“ა.წ. 2 ივნისს სრულიად საქართველოს კათოლიკოს-პატრიარქს შეხვდნენ ხორავას ქუჩაზე მომხდარი ტრაგედიისას გარდაცვლილი ახალგაზრდების – დავით სარალიძისა და ლევან დადუნაშვილის მშობლები და ოჯახის წევრები. მისმა უწმინდესობამ კიდევ ერთხელ მიუსამძიმრა მათ მომხდარის გამო და უსურვა ღვთის შეწევნა. შეხვედრები იყო მხოლოდ სულიერი დატვირთვის და სხვა მიზანი არ ჰქონია.
შევნიშნავთ იმასაც, რომ ა.წ. 1 ივნისს, თავისუფლების მოედანზე გამართულ შეკრებაზე მონაწილეობდნენ სასულიერო პირებიც და გაკეთდა შეფასება პარლამენტის შენობის წინ მიმდინარე აქციასთან დაკავშირებით. ეს ქმედებაც და განაცხადიც არის მათი პირადი ინიციატივა და ამის შესახებ საქართველოს საპატრიარქო ინფორმირებული არ იყო“, – ნათქვამია განცხადებაში.
შეგახსენებთ, რომ ზაზა სარალიძე, სხვადასხვა მოთხოვნით, საპროტესტო აქციებს რამდენიმე დღეა მართავს. პარლამენტთან საპროტესტო აქცია დღესაც განახლდა. ზაზა სარალიძის განცხადებით, ის არ აპირებს აქციების შეწყვეტას მანამ, სანამ მისი მოთხოვნები არ დაკმაყოფილდება.