ღრმაწყლოვანი პორტი საქართველოს ჰაერივით სჭირდება – ნათია თურნავა

საქართველოს ღრმაწყლოვანი პორტი ჰაერივით სჭირდება, – ამის შესახებ საქართველოს ეკონომიკისა და მდგრადი განვითარების მინისტრმა, ნათია თურნავამ განაცხადა.

თურნავას თქმით, თუკი ანაკლიის განვითარების კონსორციუმი დადგენილ ვადებში არ წარმოადგენს პორტის დაფინანსების გარანტიებს, სამთავრობო გუნდი პროექტის განხორციელების სხვა შესაძლებლობებზე იმსჯელებს.

„არ მინდა, მოვლენებს გავასწრო. მიუხედავად იმისა, რომ სულ რამდენიმე დღეა დარჩენილი ინვესტორის გარკვეული დედლაინების ამოწურვამდე, მაინც არ მინდა, ნაადრევად ვისაუბრო. დავაცადოთ, ფორმალური დედლაინი დადგეს და შემდეგ, რა თქმა უნდა, სამთავრობო გუნდი შევიკრიბებით და ვნახავთ, რა გავაკეთოთ იმისთვის, რომ ეს ყოვლად აუცილებელი პროექტი ბოლოს და ბოლოს განხორციელდეს. ეს პროექტი დაგვიანდა. ინვესტორის მოთხოვნით, 2017 წლიდან ხდება გადავადება. პირვანდელი ვადით, მომავალ წელს უკვე პირველი ეტაპი უნდა ყოფილიყო მწყობრში და ღრმაწყლოვანი პორტი გვექნებოდა. სამწუხაროდ, ასე არ მოხდა“, – აღნიშნავს ნათია თურნავა.

მინისტრის განცხადებით, ანაკლიის პორტი ძალიან სტრატეგიული და პრიორიტეტული პროექტია. ამასთან, საქართველოს პორტებში დღეს ტვირთბრუნვა უკვე რეკორდულად გაზრდილია.

„რა თქმა უნდა, ძალიან წაგვეშველებოდა ​ანაკლიის დროულად აშენება“, – აღნიშნა ნათია თურნავამ.

კომენტარები

დატოვე კომენტარი