პრემიერ-მინისტრის, ირაკლი კობახიძის თქმით, “ნაციონალური მოძრაობა” ხელისუფლებაში ვერ დაბრუნდება.
“პოლონური მოდელი რაც არის, არ მინდა ჩავუღრმავდე, ძალიან კარგად იცის ყველამ, ვინც ამ საკითხებში ერკვევა. ჩვენი მხარდაჭერა დღეს 60%-მდეა, მთელი ამ ერთი წლის განმავლობაში 55%-დან 60%-მდე მერყეობდა, რაც 2012 წლის შემდეგ, ყველაზე მაღალი მაჩვენებელია ანუ გასული 1 წლის განმავლობაში, საზოგადოებისგან 55-დან 60%-მდე ურყევი მხარდაჭერა გვაქვს. ასეთ ვითარებაში, ზოგადად კოალიცია, პრაქტიკულად, გამორიცხულია. ვიდრე არჩევნები ჩატარდება წინ არის 7-8 თვე, მაგრამ არსებით ცვლილებებს ბუნებრივია, არ ველოდებით. ოპოზიცია განსაკუთრებით, მისი რადიკალური ნაწილი მარცხისთვისაა განწირული. როცა საუბრობენ კოალიციაზე, აქ სინამდვილეში, „ნაცმოძრაობის“ ხელისუფლებაში დაბრუნება იგულისხმება. გასაგებია, ამ ყველაფერში რაც იგულისხმება, „ნაცმოძრაობის“ გარეშე უნდა შეიქმნას კოალიცია, აქ ჩაერთვება სალომე ზურაბიშვილი, ლელო“ და ა.შ. ეს ყველა ერთი ხალხია, ერთი ნიშნით არიან წარმოდგენილები. აქედან გამომდინარე, თუ ვინმე „ნაცმოძრაობის“ ხელისუფლებაში დაბრუნებაზე საუბრობს, ეს რა თქმა უნდა, შეუძლებელია, ვერანაირი შეფუთვით „ნაცმოძრაობა“ ხელისუფლებაში ვერ დაბრუნდება. ერთი ფაქტორი, ჩვენი მხარდაჭერა 55-დან 60%-მდეა მუდმივად. ოპოზიციას რაც შეხება, „ნაცმოძრაობის“ ბოლო რეიტინგი 18% იყო, 20%-ს ძალიან დიდი ხანია უკვე ჩამოცილებულია, ვერც ერთი სხვა პარტია დღევანდელი მოცემულობით ვერ ახერხებს 5%-იანი ბარიერის გადალახვას, ასეთ პირობებში, „ნაცმოძრაობის“ ხელისუფლებაში დაბრუნება სალომე ზურაბიშვილს აუხდენელ ოცნებად რჩება“, – განაცხადა კობახიძემ.
მისივე განმარტებით, პრეზიდენტი კანდიდატის სტატუსის წინააღმდეგ აგიტაციას აწარმოებდა.
„ის არ არის კრიტიკული, ის არის კოლექტიური „ნაცმოძრაობის“ შემადგენელი ნაწილი, ამიტომ ემთხვევა მისი რიტორიკა „ნაციონალური მოძრაობის“ რიტორიკას ერთი ერთში. როცა საუბარია ანტიდასავლურ ქმედებებზე, ის პირდაპირ ეწინააღმდეგებოდა საქართველოსთვის კანდიდატის სტატუსის მინიჭებას, როცა ამბობდა, რომ ჩვენ არ გვეკუთვნოდა კანდიდატის სტატუსი, როცა ამბობდა, რომ ხელისუფლება კანდიდატის სტატუსის მისაღებად არაფერს აკეთებდა, ის პირდაპირ აწარმოებდა აგიტაციას კანდიდატის სტატუსის წინააღმდეგ, სწორედ, ეს არის ანტიდასავლური ქმედებები, რომელსაც სალონე ზურაბიშვილი ახორციელებდა“, – განაცხადა კობახიძემ.