სამეგრელოში თოვლის საფარისგან გაწმენდითი სამუშაოები მიმდინარეობს

სამეგრელოში-ზემო სვანეთის რეგიონში მეორე დღეა თოვლის საფარისგან გაწმენდითი სამუშაობი მიმდინარეობს. რეგიონის მასშტაბით მუნიციპალიტეტბში საგანგებო შტაბები მუშაობენ, რომლებსაც კოორდინირებას სამეგრელო-ზემო სვანეთის გუბერნატორის ადმინისტრაციაში შექმნილი შტაბი უწევს.

სამეგრელო-ზემო სვანეთის გუბერნატორის ადმინისტრაციის ინფორმაციით, ამ დროისთვის გზები გაწმენდილია ტყაიას, ჩხორიას, გრიგოლიშის, ჭაქვინჯის, ჯიხაშკარის მიმართულებით, სხვა ადმინისტრაციულ ერთეულებში კი ტექნიკა გასულია და გაწმენდითი სამუშაოები ყველა სოფლის მიმართულებით ჩატარდება. დიდთოვლობამ ელექტრო გადამცემი ხაზებიც დააზიანა, რის გამოცა ამ დროისთვის ელ.ენერგია არ მიეწოდება გრიგოლიშის, რიყეს და ჭკადუაშის ადმინისტრაციულ ერთეულებს. „ენერგო პრო ჯორგია“ პრობლემურ ადგილებში სამუშაოებს აწარმოებს და მოსახლეობას ელექტრო ენერგიით მომარაგება უახლოეს მომავალში აღუდგებათ.

ჩხოროწყუს მუნიციპალიტეტში თოვლის საფარი 30-40 სანტიმეტრს აღწევს. ამ ეტაპზე მიმდინარეობს როგორც სახელმწიფო მნიშვნელობის ასევე შიდა საუბნო გზების გაწმენდითი სამუშაოები. ელექტროენერგია 13 ადმინისტრაციული ერთეულიდან არ მიეწოდება სოფელ ნაკიანს, მუხურს, თაიას, ლესიჭინესა და ჭოღის ცალკეულ უბნებს.

„ენერგო–პრო ჯორჯიას“ ჩხოროწყუს ფილიალის დირექტორის განმარტებით ყველა დაზიანებულ უბანში გასულია ტექნიკური სამსახური და ელექტროენერგია მოსახლეობას  უახლოეს საათებში აღუდგება.

რაც შეეხება, ზუგდიდი-ჯვარი-მესტია-ლასდილის საავტომობილო გზის კმ30-188 (ჯვარი-უშგული) მონაკვეთზე  აკრძალულია მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა, ხოლო დანარჩენი სახის ავტოტრანსპორტის მოძრაობა მოძრაობა დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ავტოტრანსპორტის მოძრაობა თავისუფალია. სამეგრელო – ზემო სვანეთის მხარეში შემავალ სხვა მუნიციპალიტეტებში ამ დროისთვის გზებზე მოძრაობა შეუზღუდავად ხდება. მიმდინარეობს გზების გაწმენდითი სამუშაოები.

გუბერნიის ცნობით, ადგილი არ ჰქონდა მოსახლეობის მომართვიანობას საცხოვრებელი სახლების დაზიანებასთან დაკავშირებით.

 

კომენტარები

დატოვე კომენტარი